Home
மூச்சுமொழி

சீனிராஜ் சிவகுமார்


குபேரனாக இருந்தாலும் குசேலனாக இருந்தாலும் சந்தோஷமாக வாழக் கற்றுக் கொள்ளுங்கள். அதுவே சிறந்த கல்வி.

பகுதி I

ப்ராணாயாமம்

ஆசனம் செய்பவர்க்கு - மெய்
ஆயிரம் சுகம்பெறுமே.
யோசனை ஏன்வேண்டும்? - சிவ
யோகியர் அம்சம் நாம்

செல்களில் பரவசத்தை - தினம்
செய்தவர் உணர்ந்திடுவார்.
கல்மனம் இளகிடுமே - அது
காற்றினில் பஞ்சாகும்.

ஒவ்வொரு மனிதனுமே - இறை
ஒளியிலோர் போட்டானே. (Photon)
கவ்விய இருட்டினுள்ளே - நம்
காட்சியில் ஒளிக்கனலே.

ஒட்டிய நுரையீரல் - திசு
உப்பிடும் இருபந்தாய்.
கிட்டியும் கிட்டாத - இதக்
காற்றதில் நிறைந்திடுமே.

குசேலன் விதிமாறி - ஒரு
குபேரன் ஆனதுபோல்
பசியது தீர்ந்திடுமே - செல்
பருகிடும் ஆக்ஸிஜனை.

ஆக்ஸிஜன் பஞ்சத்தில் - இனி
அயர்வுறும் நிலையில்லை.
பூக்கிற மனசுக்குள்ளே - விஷப்
புகைக்கென இடமில்லை.

பதஞ்சலி இதைச்சொன்னான் - திரு
மூலனும் பரிந்துரைத்தான்.
முதியவர் யாருமில்லை - நம்
மூச்சினில் இளமைவைத்தான்.

ஆயிரம் நூல்புகுந்து - நல்
அறிவினில் சிறந்தாலும்
நீயுனை வழிபட்டால் - அது
நிச்சயம் பெருங்கல்வி

வங்கியில் திருமகளும் - மனை
வாசலில் புதுக்காரும்
அங்கமும் ஆருயிரும் - படும்
அல்லலில் தரித்திரமே.

அங்கமும் ஆருயிரும் - பெறும்
அனுதின யோகத்தால்
தங்கமும் தேவையில்லை - அத்
திருமகள் அருளெதற்கு?

பகுதி II

ஐம்புலன்களில் சிறந்தது எது?

இன்னிசை கேட்பதில்லை - செவி
இரண்டிலும் ஒலியிழந்தால்.
கண்களில் ஒளிகுறைந்தால் - நாம்
காட்சிகள் காண்பதில்லை.

அறுசுவை ஒருசுவையே - சொல்
அறுந்திடும் நாவிழந்தால்.
உறைந்திடும் உணர்வுகளே - மெய்
ஒருநாள் மறுத்துவிட்டால்.

அந்த மெய் கண் காது - நா
அத்தனை முக்கியமா?
முந்திநான் நானென்னும் - துளை
மூக்கது முக்கியமா?

நாற்புலன் நாமிழந்தால் - நல்
வாழ்க்கையில் குறையுண்டு.
காற்றறை கதவடைத்தால் - இவ்
வாழ்க்கையே கிடையாது.

மூச்சினில் மலர்ச்சிபெற - பெறு
முனிவரின் பயிற்சிகளை.
பாய்ச்சிடு ரத்தத்தில் - புதுப்
பரவச உணர்வலையை.

2007
Best viewed with 1024 by 768 pixels resolution.© www.seenirajsiva.in , All rights reserved.
Home Contact Us